啥个是嘉定闲话（吴语•嘉定话 原文 附音频）

好好，处男兄有寔恁个劲道蛮好！不管是南片还是北片，侪是嘉定个组成部分，不管是何里个乡镇个方言，侪是嘉定方言个一支。嘉定镇原住民个方言当然可以作为代表之一，但不管是近太仓个外冈、近青浦个黄渡还是近上海个江桥，当地原住民个方言当然也可以作为代表。各个地点有自家个一套标准，但互相之间侪是有交关共同性个，千万覅只看见著小部分个差别，忽视著占多数个共同性。<?xml:namespace prefix="o" ns="urn:schemas-microsoft-com:office:office"></?xml:namespace>
从《嘉定县志》忑《嘉定方言研究》记录个嘉定镇方言来看，两个发音人个音系也有一定差别，《嘉定县志》个发音人忑嘉西、方泰、望新、外冈、朱桥、娄塘、唐行、华亭、曹王差不多，《嘉定方言研究》个发音人忑徐行差不多。两本书个发音人虽然侪是嘉定镇个，但其详细记录个语音、词汇、语法对于整个嘉定方言区侪有极高个参考价值，说明整个嘉定方言区本来就是高度相似个，只是本地人对细微个差别侪会比较敏感。
需要注意个是，语言分区不是我自家瞎划划个，递个是钱乃荣、陈忠敏、汤珍珠嘞啥老一辈语言学家用语言学个方法得出个严谨结论。南翔闲话可能对于嘉定中北部个人听感上讲有点特殊，但所有学者侪是拿南翔划垃嘉定方言区个，就像鲸鱼生得像鱼，但原旧是兽类，除非处男兄听见个是已经改口讲上海城区方言个南翔人。钱乃荣教授拿嘉定方言区划入太仓方言大区，递个是嘉定方言区个上级归属，就像安亭、江桥属于松江方言大区一样。
代表不代表实际上是一个无关紧要个问题，只要是，就可以立出来。就像人个代表，到底算啥个人种嗫？黑人，白人，还是黄种人？实际上呒不意义个，随便啥人立出来侪有人个共同特征。当然，所有人种侪立出来就构成著完整个人类。但目前个情况是，拿嘉定本土方言放到网上让外界晓得个只有我伲个别人，嘉定本土方言个全貌还不完整，处男兄与其反对我展示嘉定北头闲话，还不及拿自家个南头闲话也垃网上展示展示，让外界晓得一个更加完整个嘉定。
还有，处男兄要克服必须以中心城镇为标准个思维局限性。最近个全国方言普查，原则上一县一个调查点，通常是县城，但宝山确定个调查点就是月浦，因为宝山城里已经各支人群高度混杂，难以寻着正正式式个宝山县城个老闲话啧。嘉定虽然还是选个县城，但五方杂处个情况也存在。从世界范围来看，意大利共同语个基础方言就是多斯岗方言，不是首都罗马个方言；美式英语风靡全球，但好像也呒不人板要用英国伦敦个方言去指责美式英语代表英语。
希望有能垃网络社区听见处男兄个南头闲话。递个也是为啥我个 疁语广播站 后头要加 之一 递两个字。