周丽淇（Niki）几个月前已经传出因为喺内地拍《大汉贤后卫子夫》，而同内地小生徐正曦挞著，不过当时Niki死口唔认，似乎惊恋情见光死。
不过早两日，Niki同徐正曦拖手断正，更加喺上海酒店齐齐过夜，今次真系唔轮到Niki唔认，所以噚日有报道话，前日Niki喺内地机场飞去新加坡，见到记者佢都大方承认同徐正曦蜜运中，佢话:「好开心，好开心，多谢大家关心我的感情事，希望今次好好地去过一个正常的拍拖生活。」
报道话Niki觉得徐正曦份人好乖仔，又冇不良嗜好，处事成熟又有上进心，倾倾吓仲发现大家都钟意宇宙同UFO话题。据知徐正曦初期觉得同Niki好倾都冇追求，都系考虑到对方年纪，34岁嘅Niki年纪唔细，佢觉得做男方责任好大唔可以玩玩吓，要以结婚为前提交往，最后佢觉得搵到个有感觉嘅人唔容易，所以就决心追求。
28岁嘅徐正曦被誉为「黄晓明接班人」，去年更劲赚2000万人仔，佢老窦系内地政府官员，家族搞五金生意身家逾亿，绝对系富二代笋盘。