港姐停辦！蔡思貝：以健康為大前提
前港姐蔡思貝與張振朗為無幾節目《流行經典50年》錄影，二人將合唱楊千嬅的《小飛俠》。對於港姐今年停辦，蔡思貝表示現時疫情狀況，停辦絕對合理：「係可惜，但以大家健康為大前提，聚集咁多人有一定風險，呢個公司決定好明智，冇咗一屆，但亦都成為一個經典。（今屆港姐連任好辛苦？）歷史性做兩年，呢個經歷亦都帶到畀佢哋寶貴經驗。」

首次於節目獻聲的蔡思貝，坦言心情緊張，擔心表現未如理想，影衰新秀出身的張振朗，問到可有向緋聞男友胡鴻鈞取經？她說：「如果呢啲都要畀心水，咁我日日登台賺錢啦！我都係靠自己練習，等聲帶習慣唱歌。（走音？）唔會，我唔係五音不全，只係唔識開聲同唔夠氣。」
為了爭取時間，蔡思貝指二人近日也趁開工時練歌，幸好劇組同事評價不錯，更笑言二人應做組合，張振朗即建議取名「思朗」。