蔡思貝「獨眼龍」上陣　自爆右眼做咗手術

陰功豬…
藝人蔡思貝今日為無綫新劇《踩過界II》出外景拍攝，見她「獨眼龍」上陣，只化左眼眼妝！
她自嘲是最新化妝技術，續自爆右眼昨日施了一個小手術，故不敢上妝：「前幾個星期右眼又痛又痕，但一直冇理，可能對上拍咗場喊戲，我就咁用手抹眼淚、捽眼，冇洗手唔乾淨，可能細菌感染，自己有滴眼藥水嘅，但愈嚟愈拮眼、又乾，前幾日仲腫起，摸到有粒硬嘢，就係生眼瘡，尋日仲有粒白色嘅膿頭，冇晒辦法要即刻搵眼科醫生。」
幸好即時有好友賴慰玲推薦醫師，思貝指：「醫生話我可能唔夠瞓、壓力大、免疫系統差咗、工作環境多塵搞到咁，仲話如果我早啲去，食藥就冇事，但我隔太耐，就要做個小手術，要反起個眼皮做。（影響拍攝？）都冇嘅，係咁用左邊面，好快會好番，如果播出就睇吓大家發唔發現到，依家每一開一組，都有足夠時間休息。」並指會勤於屋企做運動增強抵抗力。