「內地登台遇熱情男粉 吳卓羲爆：會拖住我手」藝人吳卓羲（Ron)出席護膚品活動，現場女賓客如螞蟻嬲蜜糖，不過他表示已見慣女粉如此熱情：「都係為咗影相，試過喺街衝上嚟翹住我手！（有冇錫你？）冇，始終女仔有矜持，我又唔係天王，好少有呢啲，通常都係翹手，有啲叫我抱抱攬攬，（有冇拒絕過人？）好難拒絕，可能攬一攬落台，好開心嘅。」他表示熱情粉絲多出現在內地登台時，可能少見他，故比較熱情。問有否遇過熱情男粉？他說：「都有，但唔會要求錫嘅，影張相合照，會拖住我手，好似好朋友咁，冇得拒絕嘅，可能我仲大力過佢，咁熱情見面係一件開心事。」早前他宣布計劃今年推出其經典歌《別怪她》製作15周年下集版本，問到錄歌進度，他透露正在拍戲，稍後要開網劇，所以起碼等兩三個月後：「鄧智偉一路做緊歌，諗緊主題，（聽過雛形未？）未有，仲要開會，智偉定咗方向，會搵啱我唱嘅歌（係情歌？）情一情都要，去到邊情歌都煞食嘅！」
秘境
