NUENGX NDAW SUEN MIZ MAK
Nuengx ndaw suen miz mak,
Beix cup bak hozhaenz;
Cam nuengx dah va’ngaenz,
Gwn saek aen ndaej mbouj?
Go mak youq ndaw suen,
Cuk ciengz sam cungz cab;
Sam bi cij dawz mak,
Hanz fag cungj mbouj hai(gai).
Mak ciemh ngoenz ciemh rang,
Mbou wngdang caiq daengj;
Mboujyawx seizneix caengh,
Mienx haethaemh hoj hen.
Caih gou hen cix hen,
Liengh mbouj gven mwngz saeh;
Raen mak cix luenh ngeix,
Gaej cauh saeh hwnj ndang.
Vunz caeg bit caeg gaeq,
Mbouj raen saeh hwnj ndang;
Gwn saek aen makgam,
Lwnhdang mbouj miz saeh.
Mwngz naeuz mbouj miz saeh,
Sawq gaex dou haeujdaeuj;
Faexhanz moeb gwnz gyaeuj,
Mwngz cij rox naeuz in.
Aen mak youq gwnz go,
Naihhoz mboujndaej euj;
Da rez gvaqbae myeux,
Bak geux ndwnj naizsaw.
Mak nuengx cungj lij mwnh,
Biq caenh saemh ij cam;
Cograwz de diemzgam,
Menh faen langz cimz feih.
Caih de mwnh cix mwnh,
Mbiq faen gyaenh raeuz hamz;
Cograwz de diemzgam,
Gvaq cib hangz gouj bouq.
Cingj cuengqsim roengzdaeuj,
Gaej dungxmbouq simdan;
Deq mak nuengx diemzgam,
Gag hawj langz cimz feih.
----- Daegdenz Ranzcung soucomz cingjleix