藝人蔡瀚億（BabyJohn）到旺角為主演的新片《西謊極落：太爆·太子·太空艙》拍攝宣傳片，BabyJohn以長髮MK造型在街頭兜售「四仔」（色情光碟），並追打挑釁的肥仔，吸引路人圍觀，雖然BabyJohn勁入戲神情兇狠，但仍被其Baby face出賣，依然欠缺殺氣！
好驚畀同學見到
講到戲中角色，BabyJohn笑言是生錯年代：「已經成為黃昏行業先學人賣四仔、走水貨！呢個商場係發源地，當年讀書時係黃金時代，我學校就喺後面咋！係我嘅必經之路，每日都見到個叔叔叫賣，風雨不改！（有冇幫襯過？）幫襯買GAME！我上一樓、唔係三樓、四樓，每次入去都好驚同學見到。（有冇研究過四仔？）唔使研究啦，學唔到嘢㗎！」
旺角殺落銅鑼灣
BabyJohn又謂其「陳浩南」長髮造型是假髮，每次都要花兩小時Set頭：「其實我都想保密吓造型，試到呢個Look好開心，以前可以由旺角殺落銅鑼灣！依家落到屋企樓下都畀警察問話啦！（太太有冇睇過？）有，佢話我勁MK！（試過留長髮？）留過，但真係留唔到咁長，一定要用假髮。」

蔡瀚億在旺角商場外拍攝宣傳片，以「陳浩南」長髮造型賣四仔。

BabyJohn被Baby face出賣始終欠殺氣！

BabyJohn指賣四仔是夕陽行業。

BabyJohn戴假髮扮「陳浩南」。