聽日就係一年一度嘅萬聖節，又係一眾嘩鬼出動嘅日子。而「myTV SUPER」嘅facebook專頁最近亦舉行投票，等大家投選心水角色。最高票數嘅就係《大鬧廣昌隆》嘅索爆厲鬼「小芙蓉」（周海媚飾演），當年劇集播出街後，好多觀眾都睇到心慌慌，着住民初衫化身「小芙蓉」，行出街一定嚇死人，又可以力保靚樣，真係一舉兩得！第二名就係謝安琪（Kay）喺《殭》嘅殭屍造型，戴假犬齒同尖銳指甲嘅Kay似足殭屍，加上靚樣，唔少男士肯定又要驚又想佢埋身咬一啖！不過萬聖節扮鬼唔係港女嘅專利，男士們一樣得！如果肯犧牲靚仔樣，可以考慮吓《真過癮時代》吳鎮宇嘅「皇妃超人」，着住緊身衣加上咸蛋眼罩，仲有奇特造型嘅帽，包保你變成全場焦點！亦有唔少網友覺得萬聖節淨係扮靚唔好玩，反而推介經典醜角造型，仲話要扮醜先嚇到人應節喎！講到經典醜角，不得不提被封世紀醜女嘅「李笑好」，飾演呢個角色嘅湯盈盈成頭油笠笠，加上一口倒及牙，認真睇見都唔開胃，夠晒嚇人！而喺《老表，你好hea！》飾演「烏笄」嘅吳沚默，畫上「蠟筆小新」嘅粗眉，醜得嚟又有啲CUTE，啱晒一班鍾意扮CUTE嘅港女。再唔係學《為食神探》中樂瞳嘅醜女造型，面色暗沉又成面汗斑，同樣醜得夠搶眼。