好可惜！原本仲鲶住主场双杀上港，最终3:3握手言和，两队分差依然都系5分，富力错失拉近分差既机会；上港今晚可以全身而退，真系要好好多谢边裁，武磊第二个入球根本就系越位球，从慢镜重放，武磊既企位同准备接应球果一刻绝对係越位，而边裁距离咁近又无视线干扰既情况下，居然“放狗”，可想而知，上港靠“契爷”打天下既标签绝非浪得虚名，今晚主裁係绝对无问题，表现同控制局面都唔错，但边裁係今晚裁判组既最大污点，无距偏哨，富力今晚肯定逆转赵硬上港。咁好，我地让子弹飞多一阵，睇下接落黎既亚冠赛场，上港可唔可以靠“契爷mode”脱颖而出，我地各位富力球迷拭目以待。
虽然打平，有边裁外围影响战局；亦有好多球迷会话富力打出血性，打出自己既漂亮足球都收货，但我觉得导致富力咁既比分结束，纯粹係富力教练史度积高域想作死既表现所导致，列出四大“罪状”：1.关键大战在即，居然沙场点兵点到之前表现好好既程月磊打后补，韩峰首发。从表现上睇，韩峰整体表现的确可圈可点，抛开边裁偏哨唔讲，就讲距毛燥咁出迎武磊果单刀波，同埋高空球判点同提肠协防既能力表现好差，令人想起曾经胆战心惊既名宿“漏电先生”；2.替补居然上基安奴。替补表现大家有目共睹，继续发挥距既“水9”特性。我好想质问教练一句，基安奴无支点、无冲击力、无串扰，上黎做咩呢？莫非就冲距亚洲外援既称号，上王晓龙都好过距；3.曾超居然去打右后卫，防守艾华。曾超上场，马上就分散到对方后卫既注意力，令到沙希域有更多既空间去组织攻势。但反超后，教练史度积高域就保守啦，指挥曾超客场右后卫利用速度抑制艾华既活动范围，想法唔错，但对方后场无曾超既串扰后马上盘活起身组织攻势，最后临完场既点球，曾超走甩左艾华，导致史云逊禁区犯规被判点球，可总结出依个战术係失败，唔可以怪曾超，曾超根本唔识防守；4.明知上港吸取上次兵败足协杯既教训，仲叫两边压得过上，粗略估计富力两边俾上港打身后加埋起码超过十六次，其中两次导致产生两个失球；明知山有虎，偏要虎山行，无言以对！想打强队有成绩，富力既教练组必须吸取今场指挥失误既教训。