無綫劇集《警犬巴打》喺尋晚大初二首播，劇中除咗有黃宗澤Bosco同黃浩然兩大型男做警察外，仲有前港姐朱千雪（Tracy）破格飾演貪錢港女，睇得一眾網民鬼咁投入，更開post封佢為「girlfriendable」之最，亦大讚早前到咗布拉格及維也納遊學攻讀碩士嘅Tracy於現實中一樣咁正，仲有幾分書卷味咁話喎。
備受網民熱捧嘅Tracy於劇中飾演與黃浩然拍拖四年嘅女朋友，一直反對男友當差嘅佢仲用分手要脅對方辭職，繼承家族上市餐廳生意，仲出盡招數逼男友就範，令一眾「巴打」個個愈睇愈投入，仲有「過來人」留言訴心聲：「咁又唔會真係有少爺唔做去捱嘅，不過女友就一定會要你揀份多錢啲架囉。」其後講到黃浩然企硬，Tracy敗走返屋企打畀富二代兵仔之際，佢又因Bosco嘅提醒下再發現到男友優點，然後冧笑再現，網民都覺得佢演得恰到好處呀！
之前JW（王灝兒）嘅一首《矛盾一生》，由上年hit到依家，大家都覺得JW唱出港女嘅內心矛盾，依家Tracy直情演埋出嚟﹐，仲演得咁好，唔怪得網上絲打都大讚佢完全表達到女士們內心矛盾同掙扎：「由內到外再到返內，朱千雪真係做得岩岩（啱啱）好，完全演繹到港女內心矛盾同掙扎。」
網民有話兒：chowxxxxxk：救命！朱千雪真係好正，仲剪埋個咁嘅瀏海，好gfable！
xx大師：咁又唔會真係有少爺唔做去捱嘅，不過女友就一定會要你揀份多錢啲架囉。
陳x老公：絲打表示：真心，最緊要佢有興趣、有前途。
Tsangxxxxxau：係就係貪錢，但佢又做到一啲都唔乞人憎，怪只怪現實嘅殘酷...
米xx素機：由內到外再到返內，朱千雪真係做得岩岩（啱啱）好，完全演繹到港女內心矛盾同掙扎。
《警犬巴打》只係播咗一集，Tracy已經俘虜咗一眾巴絲打嘅心。

笑得咁甜，邊個會唔like！