佢揸住價值24萬鎊嘅勞斯萊斯去到卡寧頓訓練場。
曼聯前鋒迪比加盟曼聯至今，大部分時間冇貨交，但行為舉止好浮誇，你話雲高爾如履薄冰，查賽迪比喺曼聯嘅前途更加凍過水。
迪比（Memphis Depay）喺拆禮物日作客史篤城交唔出表現之餘，仲成為咗失波罪人，事關佢喺開波19分鐘後，喺格連莊臣力逼下想用頭槌回傳番畀門將迪基亞，點知頭槌乏力，畀對方搶到個波，由保贊射入，呢個失誤就令紅魔先失一球，最終以0:2輸波而回。
呢位仁兄未做學到星級名將喺球場上嘅本領，就走去學球星舉止，名實不符。佢之前戴牛仔帽，又穿血紅色Louis Vuitton圍巾，已經俾傳媒笑佢浮誇兼冇品味。不過佢闊佬懶理，沒有最誇只有更誇，近期就高調揸住架價值24萬鎊嘅超級豪華跑車勞斯萊斯去到卡寧頓訓練場，再次成談論焦點，報道冇提到架超級豪華跑車係咪由迪比擁有，但當佢架車駛入停車場後，隊友表面取笑佢，背後實都佢有微言。又係嘅，今時今日隊波處於逆境，無數攝影機對住，凡事低調啲好。
查實迪比場外嘅行為一早惹嚟球隊高職關注，佢已經被警告過，喺球場外散發個人色彩之前，先要集中精力確保場上嘅表現，而助理領隊傑斯曾經勸過呢位年輕人，喺奧脫福生涯要做出正確嘅決定。
當年傑斯仔作風傾向低調，自然唔鍾意浮誇，對迪比印象好極有限；傑斯仔就算未坐正，喺曼聯長撈長有，假如迪比屢勸不改，怕且前途似「咁」。迪比最好生性，咪再做自毀前程嘅事啦。