★Love·Joey★【动态】祖儿红爆庆生粉丝高叫：结婚

•祖儿悉心打扮出席Fans帮自己举办嘅生日会。
•祖儿为答谢歌迷，同Fans合唱歌曲，玩得好开心 。
乐坛天后容祖儿自完成《1314演唱会》出席歌迷会为自己举行嘅庆功宴后，已经有一排无见过佢班歌迷。经过几个月嘅休养生息，喺临近「616」生日，祖儿日前就悉心打扮，兴奋现身Fans帮自己举办嘅生日会。
「饿」咗几个月无见偶像嘅粉丝们，一见到祖儿入场就即刻欢喜若狂地起哄 ！搞到祖儿见到呢班忠实歌迷嘅兴奋样，自己都擘大口狂笑，尽显真性情一面。
同Fans合唱三首歌
见到祖儿，歌迷会会长就话畀祖儿知，话有新会员参加今次生日会。祖儿听到即搞笑扮到好「惊讶」咁话∶「哗！几个月无公开露面做嘢，咁都招揽到新Fans？真开心欢迎佢哋加入！」
现场祖儿就同成班歌迷打成一片，大玩「估歌仔」游戏，祖儿自然少不免同班好似屋企人咁嘅Fans们倾吓偈。唔少歌迷仲不时大叫：「结婚…」冧到祖儿咔咔声大笑 。除咗同每位歌迷逐一影相留念之外，仲同埋啲粉丝嘅「下一代」合照，见到啲Fans已成家立室，祖儿真心感到好幸福。
祖儿自演唱会失声以来，歌迷不断的安慰和问候，她亦藉今次聚会亲口道谢：「我已经完全康复，请大家放心！」粉丝们随即叫祖儿「唱歌…唱歌」 ! 为答谢成班歌迷，祖儿即兴同所有Fans合唱咗三首歌 。
祝粉丝们身体健康
活动完结前，祖儿衷心祝福粉丝们身体健康，仲分享自己如何面对失声，佢就话经过今次∶「深深体会到凡事只要抱着希望和坚持，要多啲同家人和朋友分享喜与忧，无论有乜难题都总会过去嘅，多谢大家！」
占士报道