Haenh Bouxcuengh
＊＊＊
Ngoenzneix daeuj hwnjmuengx,
Rox Beixnuengx caen vuen;
Sim'angq naeuz geij coenz;
Guhfwen haenh bouxcuengh.
＊
Bouxcuengh miz bonjsaeh,
Gyoengqvunz ra ndaej ngaenz;
Guh yiengh lawz cungj baenz;
Ndwenngoenz caen vuen'heij.
＊
Bouxcuengh uk gyaeuj gvai,
Ciengx max vaiz bit gaeq;
Guh naz reih ndaem faex;
Haeuj daihhag doegsaw.
＊
Bouxcuengh gyaez hek daeuj,
Gingq laeuj youh ndingq caz;
Langh mwngz siengj bae'ma;
Cungj hah youq lai haemh.
＊
Bouxcuengh fwen lai yak,
Mbat aj bak cix baenz;
Eu hwnzngoenz mbouj caez;
Ciengq maenzsaz ok rag.
＊
Bouxcuengh rox cangcingj,
Buhvaq singj youh gvai;
Lwgsau byaij ok gai;
Vunz ndwnj naiz gyiggyig.
＊
Bouxcuengh youq dieg gyaeu,
Seiqlengq laeuz couhcouh;
Lwglan miz baenz rouh;
Vunz vunz souh bak bi.
＊
Bouxcuengh raeuz caezsim,
Raemx cimq rin bienq namh;
Beixnuengx nyeh baenzngamj;
Caemh guh'angq ciuhvunz.
＊
Bouxcuengh ngoenzciet lai,
Ndwenndwen baiz letlet;
Cosam seiqnyiedbet;
Haemhndaep nep gvaq cieng.
＊
Bouxcuengh raeuz mbouj gik,
Cauh sawndip dajsan;
Gag yotfaiq daemjbaengz;
Cin daengz ndaem naz reih.
＊
Bouxcuengh………
＊
Fwen haenh mbat daengz neix,
Dauhleix dwg baenzlai
Daegcuengh noix dungxcaiz;
Guh mbouj gvai gaej gvaiq.
＊
Bouxraiz： Daegcuengh
＊
2013. 12. 1.