Aeu Fwnz
Mbauq：
Ngoenzneix gou Daegcuengh,
Raen dahnuengx doengzban;
Dawz liemz youh faexhanz;
Cam mwngz dwk lawz mbaq？
Sau：
Fwhdoeng rumzbaek nit,
Bae aeu fwnz bikfeiz;
Mij lumj mwngz baenzndei;
Miz seizgan daeuj langq.
Mbauq：
Beix mbouj dwg daeuj langq,
Hix ngamj bae aeu fwnz;
Raen doengzban saulwnz;
Siengj nem mwngz caez byaij.
Sau：
Caenh aeu mwngz caen sim,
Siengj gyaucingz yungzheih;
Langh beix miz gyaleix;
Cix gaej mbaet vunz va.
Mbauq：
Raen mwngz nuengx baenzgvai,
Caenh siengj ai caemh liengj;
Beix ndang dog dwg dingh;
Gou sim cingq gvaq maz.
Sau：
Beix aen sim baenzsoh,
Ok loh mbouj dan gou;
Gouj fuj cib sam cou;
Gvai gvaq gou daihbaj.
Mbauq：
Langh nuengx caemh ndang dog,
Cix gaej log beix sim;
Guhdoih gaq giuzrin;
Ndaej diem din caez byaij.
Sau：
Roeg ra doih caux rongz,
Gyuk haeuj ndoeng cahcah;
Aen nuengx seng ndoi laq;
Caengz raen mbaj ciuz va.
Mbauq：
Nuengx ha sim gaej gaep,
Mbwn laep cij diemj daeng;
Ndei saedceij caengz daengz;
Ngoenz laeng raeuz menh angq.
Sau：
Ndaw ndoeng song roeggae,
Caemh mbin bae doiqnaj;
Vavengj hai gwnz cah;
Muengh rwi mbaj daeuj ciuz.
Mbauq：
Mwngz nem gou Daegcuengh,
Beix dog nuengx hix dan;
Dwk rap caemh diuz hanz;
Lij miz maz caengz ngamj？
Sau：
Duzvaiz maij duzvaiz,
Caengz anbaiz caemh riengh;
Beix siengj nuengx hix siengj;
Lau vunz ciengq hanzvah.
Mbauq：
Caenh aeu raeuz caez sim,
Feiz yungz gim mbouj bienq;
Hanzvah caih vunz ciengq;
Cim caeuq sienq doxlienz.
Sau：
Siengj hemq beix ciuqgoq,
Ciuqgoq nuengx baenz vunz;
Daek vanj haeux doengz gwn;
Caemh gaem fwngz caez byaij.
Mbauq：
Song raeuz miz sim caen,
Ndaej doxgiet baenz doiq;
Caezgya bae ndaem oij;
Saed dwg coiq youh van.
Sau：
Aen nuengx youq ranz nyangj,
Mbouj daengh beix fouqgya;
Raemx doiq baengh bozhaz;
Lau nanz ha ndaej hwnj.
Mbauq：
Ranz Daegcuengh caemh hoj,
Hix dwg ndoq dangq maz;
Bozgut nem bozhaz;
Ngamq ngamj ha song gyaeuj.
Sau：
Langhnaeuz caen baenzndei,
Bae aeu fwnz dawz gut;
Beix gvej nuengx guh cug;
Cib cuk maenh youh gvai.
Mbauq：
Song bozfwnz doengz bingz,
Raeuz hix ging baenzhab;
Nuengx cug beix guh rap;
Caez dab giuj bae'ma.
Sau：
Dwk fwnzrem byoqfeiz,
Saed dawz hoengh youh raeuj;
Caemh naengh fwnz song gyaeuj;
Raeuz menh daeuj damzcingz.
Caez：
Raeuz doxgyaez guhdoih,
Lumjdoengz doiq vazmeiz;
Baenzseiq mbouj faenleiz;
Cib cuk ndei daengz laux.
Bouxraiz：Daegcuengh
2013. 11. 25.