壮文吧 关注:2,641贴子:317,724
  • 5回复贴,共1

壮文作品:山歌情缘

只看楼主收藏回复

EU FWEN BAENZ YOUX
----- Banh Dwzcungh
Daegbauj,vunz gig coengmingz,hojsik ndaw ranz haemq hoj. Daegbauj lij nyaeq couh gyaez riengz gyoengq bouxlaux hag guh fwen,mbouj guenj gizlawz miz vunz eu fwen,de cungj aeu bae dingq bae hag; raen byawz miz saw fwen, de nyengh cam aeu ma cau liux cij ce.De cau fwen seiz itmienh cau tmienh ciengq; bonj saw fwen miz cien lai hot, de mboujdanh boih sug, lij hag yiengh rox guh fwen moq dem. Ngoenz ndeu,Daegbauj hwnj bya dwk fwnz. De itmienh raemj fwnz itmienh eu fwen.Cingq nyaengq dwk simvuen seiz raen dahsau ndeu byaij gvaq laj bya, Daegbauj couh eu fwen cam:
Sau gvai byaij gvaq naj
Lumj mbungqmbaj foux mbin
Lumj duzrwi ciuz cin
Dwg mbouj cim ra doih
Daegbauj fwen baez eu sat couh goengzyongq roengzdaeuj, caj dahsau bae gyae,de cij gamj ndwn hwnjdaeuj yawj coh dahsau, cingqngamj seizneix dahsau hix nyeux gyaeuj dauqlaeng, seiq ceh lwgda doxdoiq yawj dinghdwd. Dahsau riunyumj couh cienq naj byaij lo, Mbat yawj neix,Daegbauj cij rox de couh dwg canghfwen Mbanjyungzhingh,coh heuh Dahgenh. Dahsau byaij haemq gyae le cij doiq fwen cam naeuz:
Ngoenzneix ngoenz gijmaz
Roeg douh bya neix heuh
Roeg heuh yawz mbaetmbeuj
Yiuhfeiz naeuz vameiz
Daegbauj baez najnding daengz goekrwz, mbouj gamj caiq hoiz fwen dem.Aenvih de eu fwen dwg eu gvaqyinx, mbouj miz eiq gouz cingz.De rox swhgeij yiengh mbouj mbauq,ranz youh hoj, baenlawz miz damj gamj yiengq Dahgenh eu fwen doxdaeuq dahraix?
Sugvah naeuz,miz sim ndaem va va mbouj fat, fouz sim cap liux liux dauq raemh.Daegbauj bae dwk fwnz mbwq le cix eu fwen gvaqyinx,byawz rox lauq yinx ndaej Dahgenh doiq de miz eiq. Ngoenz he, Dahgenh bae ganj haw, Daegbauj hix bae ganj haw,daengz byongh roen, songde youh doxbungz lo. Daegbauj najmong dwk veq daengz baih roen bae, canggyaj mbouj raen Dahgenh, hawj Dahgenh byaij gonq, de cij gaenlaeng byaij. Byaij dwk byaij dwk, Daegbauj raen Dahgenh byaij yiengh gig ndeiyawj, aen ndang reuxred, byaij roen seiz yo din baij fwngz couh lumj diuqfoux nei maez vunz.De hozhaenz lo,naemjnaemj cix eu fwen sawq Dahgenh:
Geij seiz namh baenz gim
Geij seiz rin baenz ngaenz
Geij seiz bit rox haen
Ndaej caeuq ngaenz caemh doih
Dahgenh dingq le, hoz humznyubnyub, fwen hoiz yaek ok bak dingjlingz baihnaj miz geij laux caemh ganj loh, Dahgenh mbouj ndei eiqsei, ngaem gyaeuj yamq din vaiq byaij bae lo. Haemhhaenx, Dahgenh baenz hwnz ninz mbouj ndaek, baez laep da, hot fwen Daegbauj couh heux youq henz rwz. Daegbauj vih guh hong sinhoj lai, couh eu fwen gaij simfanz. Naeuz gyaez Dahgenh ma,de lienz fangzhwnz hix mbouj gamj loq gvaq. Mboujliuh, ciengco miz ngoenz ndeu, de sawqmwh sou daej gouh haizbaengz Dahgenh caen fwngz guh. Gouh haiz guh ndaej saedcaih ndei saedcaih giuj, daej haiz ding ndaej deih youh yinz, najhaiz lij siuq miz duzyaemyieng,baih duzboux,baih duzmeh. Daegbauj yawj dwk ndawsim diemzsisi. Hoeng baez siengj daengz aen ranz rwix de, sim couh liengz lo. De ngauz gyaeuj laklak gyangznaek damzbubbub: "Mbouj boiq, mbouj boiq ha! Fuengz nduk ranz rwix yawz coux ndaej roegfungh?" De gaem dwk gouh haiz mbouj gamj daenj. Gvaq ndaej geij ngoenz, Dahgenh youh iu Daegbauj bae raennaj, Daegbauj youh lau youh sim'angq. Hoeng de cix ciuq ngoenz ciuq seiz bae lo. Dahgenh raen de le naj baez nding, doq fwen naeuz:


IP属地:广西1楼2012-12-17 13:44回复

    Guh haiz mbouj baenz haiz
    Lumj goepndai ndaw mboq
    Guh ndaej yoq cix yoq
    Gaej lwnh rox hawj vunz
    Daegbauj naemj cix mbouj naemj,lienzseiz ciep bak hoiz fwen haenh naeuz:
    Nuengx dwg va seiqgeiq
    Geiqgeiq cungj angj va
    Go dangq go bizbaz
    Haeuj lab va cij did
    Dahgenh gaen dwk hoiz fwen:
    Nuengx dangq aen makbug
    De doek namh cix naeuh
    Go dwg aen makgyaeuq
    Yied naeuh yied hom youz
    Songde daj eu fwen doxhaenh damq cingz, ciemhciemh doxmaij.Daegbauj youh guh fwen naeuz:
    Nuengx dwg duz roegfungh
    Beix moengh caemh siengj raen
    Haet hwnq ngeix ndaw sim
    Mbouj gwn mbouj rox iek
    Dahgenh ciep dwk youh han naeuz:
    Beix dwg faex daihloh
    Ndoj laj ndei yietliengz
    Nuengx dangq va gwnz ciengz
    Beix mbouj yiemz cix mbaet ......
    Fwen yied eu yied diemz, yied eu cingzngeih yied naek. Songde doxgyaez gienh saeh neix deng song baih hohmeh rox lo. Daxboh Dahgenh mbouj doengzeiq, yiemz ranz Daegbauj gungzhoj, mbouj doxboiq. Daegbauj rox le,couh sij hot fwen duenh cingz hawj Dahgenh:
    Haemz diuz dah neix gaz
    Caengz goengq bya neix gek
    Nanz ndaej dawz de cek
    Raeuz ndek cingz cixya
    Dahgenh ciep ndaej sawfwen Daegbauj,daej dwk da foeg bae.De sikhaek raiz fwen nai Daegbauj:
    Naek cix naek daemj dien
    Lienh cix lienh daengz daej
    Caenh aeu miz sim'eiq
    Mbouj lau faex fab ndang
    Gvaqlaeng,songde lij caegcaeg bae doxduenq. Daegbauj baez raennaj couh eu fwen:
    Ndaej aeu nuengx guh yah
    Gwn raemxdah goj van
    Haemz ranz mbouj baenz ranz
    Lau nuengx nanz haengj daeuj
    Dahgenh cix hoiz naeuz:
    Nuengx nyienh riengz beix bae
    Mbouj yiemz yaez yiemz hoj
    Caenh aeu beix simsoh
    Raeuz doxbaengh caux ranz
    Songde daj neix baelaeng cingz engq naek lo, couhcinj bohmeh mbouj doengzeiq, hix nanz euq ndaej sim songde.
    (Bien saw neix daengh youq SAM NYIED SAM bi 1998 geiz daihsam)


    IP属地:广西2楼2012-12-17 13:44
    回复
      2025-06-05 23:10:38
      广告
      我在找7字句的壮文山歌啊


      3楼2013-04-02 17:44
      回复
        找7字句勒脚壮文山歌


        4楼2013-04-02 17:46
        回复
          我手头上没有七言勒脚歌,有五言的!


          IP属地:广西5楼2013-04-03 12:16
          回复
            Caemh saw caemh uk,
            文字的统一就是思想的统一,
            Caemh uk caemh hoz,
            思想的统一就是精神的凝聚,
            Caemh hoz caemh rengz,
            精神的凝聚就是凝聚力,
            Caemh rengz caemh ak.
            凝聚力能够带来爆发力。


            IP属地:广西6楼2016-12-23 13:38
            回复